Тайлан Санхүү, бүртгэлийн тогтолцоо, Дотоод хяналт

ХасБанкны санхүү, бүртгэлийн үйл ажиллагаа нь Олон улсын стандарт, жишгийн дагуу үйл ажиллагааны хэрэгжүүлэлт болон хяналт, шалгалт гэсэн тусдаа нэгжүүдээр зохион байгуулагдсан. Санхүү, бүртгэлийн үйл ажиллагааг хэрэгжүүлдэг нэгж нь Үйл Ажиллагааны Удирдлагын Газар болон салбар, тооцооны төвүүд юм. Үйл Ажиллагааны Удирдлагын Газрын Төлбөр Тооцооны Хэлтэс нь Бүртгэл Тооцооны Алба, Төлбөр Тооцоо Дамжуулах Алба, Картын Төлбөр Тооцооны Алба гэсэн нэгжтэйгээр банкны бүртгэл, тооцооны үйл ажиллагааг хариуцан ажилладаг. Санхүү, Бүртгэлийн Газар нь банкны хэмжээнд санхүү, нягтлан бодох бүртгэлийн бодлого журам боловсруулах болон бодлого, журмын хэрэгжилтэд хяналт тавьж ажилладаг. Тус газар нь Монгол улсын Нягтлан бодох бүртгэлийн тухай хууль, Банкны тухай хууль, НББОУС болон СТОУС, Сангийн яам, Монголбанкнаас батлан гаргаж мөрдүүлдэг журам, зааврыг үйл ажиллагаандаа мөрдлөг болгодог.

ХасБанкны дотоод хяналтын нэгж нь Төлөөлөн Удирдах Зөвлөлийн харьяа Дотоод Аудитын Газар, Санхүү, Бүртгэлийн Газрын Санхүүгийн Бодлого, Хяналт Хэлтэс бүтэцтэйгээр дотоод хяналтын үйл ажиллагааг хэрэгжүүлдэг. Дотоод аудитын газар нь банкны өдөр тутмын үйл ажиллагаанд оролцохгүй, гүйцэтгэх удирдлагаас тусдаа бие даасан, хараат бусаар үйл ажиллагаагаа явуулж, хийсэн ажлаа ТУЗ-д тайлагнадаг. Дотоод аудитын газраас банкны Гүйцэтгэх удирдлага нь Монголбанк болон ТУЗ-өөс өгсөн үүрэг, даалгавар, Монгол улсын хууль тогтоомж, банкны бодлого журмыг хэрхэн хэрэгжүүлж, банкны дотоод хяналтын тогтолцоог хэрхэн бүрдүүлж байгаад хяналт тавьж ажилладаг. Санхүүгийн Бодлого, Хяналтын Хэлтэс нь банкны санхүү, нягтлан бодох бүртгэлийн үйл ажиллагааны өдөр тутмын хяналтыг хэрэгжүүлэн ажилладаг.