Нийгмийн өмнө хүлээх хариуцлага

ХасБанкны нийт ажиллагсдын санаачлагаар үүсгэн байгуулагдсан Хөгжлийн Алтан Сан (ХАС) Холбоо ТББ, Нидерландын Lek En Linge ахлах сургуулийн олон талт хамтын ажиллагааны хүрээнд нийслэлийн Баянзүрх дүүрийн 11 дүгээр хорооны нутагт байрлах арван жилийн 88 дугаар дунд сургуульд 55 мянган евротой тэнцэхүйц буцалтгүй тусламжийн төслийг хэрэгжүүлж эхэллээ.

Төслийн хүрээнд уг дунд сургуулийн байр, анги танхимд урсгал засвар хийх, сургалтын тоног төхөөрөмж худалдан авах, багш, сурагчдыг төрөл бүрийн сургалтанд хамруулах, дугуйлан ажиллуулах, спорт, урлагийн хэрэгсэл худалдан авах, 2010 он хүртэл уг сургуулийг төгссөн, сайн сурлагатай, санхүүгийн боломж муутай хүүхдүүдэд их сургуульд сурахад нь тэтгэлэг олгох, сургуулийн нэг багийг жил бүр Дуулиан 2020-д ивээн тэтгэх зэргээр санхүүжүүлэхээр харилцан тохиролцож, сайн санааны үндсэн дээр цуглуулсан хөрөнгийг шилжүүлэн өглөө.

Тус сургуулиас 100 орчим оюутнуудын бүрэлдэхүүнтэй баг хоёр жилд нэг удаа Транс-Сибирийн галт тэргээр аялдаг уламжлалтай бөгөөд зөвхөн аялаад зогсохгүй Монголын аж амьдрал, соёлтой танилцахын хажуугаар гэр хорооллын сургуульд туслалцаа үзүүлсэн байна. ХасБанкны хамт олны Монголын залуу үеийг дэмжин их спортод оруулж байгаа хөрөнгө оруулалт үр өгөөжөө өгсөөр байна. Сагсан бөмбөгийн Хасын Хүлгүүд баг 2008 оны лигийн аварга шалгаруулах тэмцээнд анх удаагаа түрүүлсэн амжилтаар Хасын Хүлгүүд хөл бөмбөгийн багийн 2007 оны улсын аваргын амжилтын буухиаг үргэлжлүүлж байна.

Банк нь 2008 оны Бээжин хотод болсон зуны 29 дүгээр Олимпийн их наадмыг Монголд нэвтрүүлэх эрх бүхий Улаанбаатар телевизтэй стратегийн түншлэлийн гэрээнд 2008 оны 3 дугаар сарын 28-ны өдөр гарын үсэг зурснаар дэлхийн 6 тэрбум гаруй хүний хүсэн хүлээдэг энэхүү Олимпийн их наадмыг ХасБанк нь UBS телевизийн сувгаар Монгол орон даяар шууд дамжуулан үзэгч олондоо хүргэлээ.

Тус Банк, Ядуурлын эсрэг хамтдаа сангийн хүрээнд МҮХАҮТ, Петровис компани, Боловсрол суваг телевизтэй хамтран бичил, жижиг, дунд бизнес эрхлэгчдийг дэмжих, ядуурлыг бууруулах, хөдөлмөр эрхлэлт, ажлын байрыг нэмэгдүүлэх зорилготой “Амьдрал Үргэлж Сайхнаараа” бизнес реалити шоу нэвтрүүлгийг бэлтгэн явуулсан. Энэхүү реалити шоунд оролцохоор 300 иргэд өргөдлөө өгснөөс 35 иргэдийг сонгон шалгаруулж, сургалтанд хамруулан, алдартай бизнес эрхлэгчдээс туршлага судлуулж, бизнесийг нь дэмжин ажилласан нь олон нийтийн таашаалд нийцсэн маш үр дүнтэй арга хэмжээ боллоо.

ХасБанк Монгол улсын хөгжил дэвшил, ард иргэд, залуу гэр бүл, нийгмийн сайн сайхны төлөө “Ургах наран” хорооллын эхний 114 айлын орон сууцны барилгыг ашиглалтанд оруулахад санхүүгийн дэмжлэг үзүүллээ. Бидний энэ жил хийсэн хамгийн томоохон ажлын нэг нь ХасБанкны нэрэмжит 108 модыг Шарга Морьтод Сэлбэ голын дагуу гишүүдийн хамт тарьж ургуулж байна. Нийслэлийн ерөнхий боловсролын 42 болон 71 дүгээр дунд сургуулиуд дээр “Би ирээдүйд - Бид хамтдаа” u224 аян өрнүүлэн, энэхүү аяны арга хэмжээнд Монголын Сумогийн Холбооны ерөнхийлөгч Кёкүшюзан Д.Батбаяр, Монгол Улсын гавьяат жүжигчин, зууны манлай дуучин Б.Сарантуяа нар оролцон “Хөгжлийн Алтан Сан” ТББ-ын хүндэт гишүүд боллоо.

Нийслэлийн Засаг Даргын дэргэдэх Хүүхдийн сургалт, хүмүүжлийн тусгай төвийн хүүхдүүдэд Японы оригами урлагийн багш С.Болормаа багштай хамтран сургалт явуулж, 3 удаа үзэсгэлэн гаргалаа. Улаанбаатар хотод зохиогдсон “Бичил зээлийн өдөрлөг”-ийн үеэр амьдралын боломж муутай харилцагчдад 5 ханат өргөө цагаан гэр, иж бүрэн тавилгын хамт бэлэглэв. Уламжлал болгон NTV телевизтэй хамтран “Халуун Сэтгэл” аянд нэгдэн амьдралын боломж муутай хоёр айлыг өргөө цагаан гэр, иж бүрэн тавилгаар хангаж дэмжлэг үзүүллээ.